Innskráning

Til refaveiðimanna, sveitafélaga og annara sem málið kann að varða

Mat á íslenska refastofninum hefur staðið yfir frá árinu 1979 þegar Páll Hersteinsson, þá í doktorsnámi, skrifaði refaskyttum bréf og bað þá um samstarf með því að senda sér kjálka úr felldum dýrum til aldursgreiningar. Árið 1985 hóf hann síðan að kryfja refi til frekari mælinga. Stofnmatið hefur staðið sleitulaust undanfarin 32 ár og frá upphafi verið í höndum Páls heitins, sem lést þann 13. október síðastliðinn.

Melrakkasetrið hefur boðist til að halda áfram rannsóknum Páls, í samstarfi við Náttúrufræðistofnun Íslands, Háskóla Íslands og Náttúrustofu Vestfjarða. Sótt var um til Veiðikortasjóðs vegna fjármögnunar á verkefninu og nú er komið fjármagn til að ráðast í verkefnið.

Eins og áður eru rannsóknirnar alfarið byggðar á góðu samstarfi við veiðimenn um allt land. Óskað er eftir þínu framlagi til verkefnisins, ef þú átt þess kost að senda til okkar hræ af felldum refum til krufninga. Mikilvægt er að fá gott þversnið af stofninum og því er óskað eftir að fá send hræ af öllum svæðum og árstímum til krufninga.

Með hverju sendu hræi fylgir útfyllt eyðublað þar sem fram koma upplýsingar um veiðina, dagsetningu og skotstað. Því nákvæmari upplýsingar sem koma með dýrinu, því betur nýtist það til rannsókna.

Eyðublöðin eru á heimasíðu Melrakkasetursins, www.melrakki.is. Einnig er hægt að fá send eyðublöð ef menn hafa ekki aðgang að prentara.

Mikilvægt er að ganga vel frá hræinu og að það sé sem „nýlegast" þannig að hægt sé að framkvæma mælingar á því. Sem dæmi um góðan frágang er að setja útfyllta eyðublaðið í plastpoka sem bundinn er við fótlegg dýrsins. Dýrið er sett í poka eða kassa og í frysti eða geymt á köldum stað þar sem hræætur ná ekki til þar til það er sent. Ef ekki fylgir eyðublað má festa spjald með nafni skyttu, dagsetningu og skotstað, við dýrið.

Skyttur fá enga umbun fyrir að bera hræ til byggða, fylla út eyðublaðið og senda hræin, aðra en þá að fá upplýsingar um helstu niðurstöður krufninga og aldursgreininga á þeim dýrum sem þeir senda.

Hægt er að senda hræin merkt sem frostvöru, á kostnað verkefnisins, með flutningafyrirtækjum til Náttúrufræðistofnunar Íslands, Urriðaholti, 210 Garðabæ.
Á Vestfjörðum er áætlað að hræjunum verði komið til áhaldahúss í þeim sveitafélögum sem eru tilbúin til slíks samstarfs. Þar verða hræin geymd í frystigeymslum þar til þau eru krufin. Að öðrum kosti eru hræ send sem frystivara til Náttúrustofu Vestfjarða, Aðalstræti 21, 415 Bolungarvík.
Í hverju tilfelli skal pakkinn merktur sem frostvara og með innihaldslýsingu. Símanúmer sendanda og viðtakanda fylgi með.

Ég vonast eftir góðu samstarfi við refaveiðimenn en slík samvinna er hagkvæmasta leiðin í rannsóknum á íslenska refastofninum sem völ er á.

Með góðum kveðjum

Ester Rut Unnsteinsdóttir

Melrakkasetri Íslands
Eyrardal, 420 Súðavík
s. 456 4922 / 862 8219
melrakki@melrakki.is
www.melrakki.is

Velferðaráðuneytið og Vinnumálastofnun standa fyrir átaksverkefni, til að fjölga sumarstörfum fyrir námsmenn, á vegum stofnana ríkisins og sveitarfélaga. Skilyrði fyrir ráðningu námsmanna er að þeir séu á milli anna í námi. Melrakkasetrið tekur þátt í þessu verkefni og óskar eftir þremur sumarstarfsmönnum sem uppfylla þessi skilyrði.

Starfslýsing:
Þróun og uppbygging náttúru og menningartengdrar ferðaþjónustu í Melrakkasetri í Eyardal. Fjölbreytt starf í boði við skráningu bókasafns og safnakosts, uppröðun umhirðu og framsetningu muna á sýningu. Leiðsögn um sýningu og móttaka innlendra sem og erlendra ferðamanna. Þátttaka í að þróa, skipuleggja og framkvæma viðburði og barnaleiðsögn. Framleiðsla og afgreiðsla á handverki og heimilislegu kaffiborði, sem og létt þrif og umsjón. Þróun og framkvæmd umhverfis- og samfélagsstefnu, aðlögun að VAKA vottunarkerfi. Símsvörun, birgðahald, bókun á sal og leiksýningum, létt bókhald og aðstoð við heimasíðu ásamt öðru tilfallandi.  

Hæfniskröfur:
Fjölhæfni og jákvæðni. Áhugi, færni og reynsla af ferðaþjónustu. Þekking og áhugi á menningu, náttúru og villtu dýralífi, góð ensku- og helst þýskukunnátta, hæfni í samskiptum og vilji til að miðla þekkingu, hæfileiki til að sinna fjölbreyttum verkefnum, lágmarksaldur 20 ár, þekking á tölvuvinnu og ljósmyndun. Kunnátta í eldhúsi, bakstur og framreiðsla matvæla og drykkja, þrifni. Aðrir kostir: áreiðanleiki, sveigjanleiki, lífsgleði, vinnusemi og stundvísi, bílpróf. Athugið að Melrakkasetrið er reyklaus vinnustaður.  

Ráðningatími:
Ráðningartíminn er tveir mánuðir á tímabilinu júní - ágúst 2012. Laun eru greidd skv. kjarasamningi afgreiðslufólks á gisti og veitingastöðum, sjá uppl. á heimasíðu Verkalýðsfélags Vestfjarða: www.verkvest.is.

Umsóknarfrestur er til 6. maí 2012. Umsóknum skal skila rafrænt með tölvupósti í netfangið: melrakki@melrakki.is. Ferilskrá fylgi með umsókninni.

Stefnt er að því að ljúka ráðningum um miðjan maí. Starfið hefst 1. júní en getur hafist fyrr. Öllum umsóknum verður svarað.

Ester Rut Unnsteinsdóttir, forstöðumaður