Nú hefur það spurst út um heimsbyggðina að á loftinu í Eyrardal sé einstaklega góður hljómburður og fólk drífur að til að koma og spila og syngja hjá okkur.
Fyrstu opinberu tónleikarnir á þessu ári verða á rólegu nótunum en hún kemur alla leið frá Þýskalandi og kallar sig McKinley Black.
Þeir sem hafa heyrt hana syngja líkja henni við blöndu af Katie Melua og dassi af bluegrass+kántrí. Við látum gestina um að dæma og hvetjum fólk til að láta þetta frábæra tækifæri ekki framhjá sér fara.
Endilega mætið í Eyrardalinn fimmtudagskvöldið 14. mars og njótið kvöldsins með okkur og þessari einstöku söngkonu.
kíkið á vefinn hennar og youtube og sannreynið - svo hljómar allt tíu sinnum betur "live" hjá okkur: www.mckinleyblack.com

Við hvetjum fólk úr nágrannabyggðarlögum til að nýta sér samfélagsmiðlana og verða samferða hingað til Súðavíkur, hingað liggja allar leiðir.

sjáumst á fimmtudaginn 14. mars - tónleikarnir hefjast kl. 20 og það er rautt og hvítt ásamt gulli í boði fyrir þyrsta gesti - já og kaffi náttúrulega..

 

melrakkarnir

Melrakkasetur Íslands hefur umsjón með fjórðu alþjóðlegu ráðstefnunni sem haldin er um melrakkann (e. arctic fox, lat. Vulpes lagopus). Ráðstefna þessi er haldin á fjögurra ára fresti og hefur aldrei áður farið fram á Íslandi.
Ráðstefnan verður haldin á Hótel Núpi í Dýrafirði dagana 11. - 13. október 2013.

 

Á ráðstefnunni verða kynntar rannsóknir á tegundinni af hálfu vísindamanna frá Alaska, Kanada, Bandaríkjunum, Noregi, Svalbarða, Rússlandi, Svíþjóð, Íslandi, Finnlandi, Grænlandi, Danmörku og Þýskalandi. Rannsóknirnar eru á ýmsum sviðum líffræðinnar og einnig þverfaglegar. Fjallað er um stöðu tegundarinnar á einstökum svæðum og á heimsvísu. Þar sem heimkynni melrakkans, norður heimskautið, hefur sýnt sterka svörun við hlýnun jarðar eru rannsóknir á lífríki svæðanna afar brýnar. Ísland stendur vel að vígi með einn sterkasta stofn tegundarinnar í Evrópu sem hefur verið nokkuð lengi einangraður frá öðrum búsvæðum. Rannsóknir okkar á melrakkanum hafa sjaldan verið brýnni og mikilvægari til þekkingar og samanburðar. Meðal þátttakenda eru virtir fræðimenn sem hafa mikla þekkingu og sterka stöðu innan vísindastofnana í sínum heimalöndum. Má þar nefna Dr. Anders Angerbjörn frá Stokkhólmsháskóla, Dr. Nina Eide frá Norsk Naturforvaltning, Dr. Eva Fuglei frá Norwegian Polar Institute, Dr. Rolf A. Ims frá Háskólanum í Tromsø, Dr. Dominique Berteaux frá Qébec í Kanada og Dr. Nikita Ovsyanikov og Dr. Irina Menyushina í Moskvu en þau stunda rannsóknir á Wrangel eyju.

 

Dagskrá ráðstefnunnar verður auglýst nánar síðar hér á heimasíðunni: http://www.melrakki.is/arctic_fox_conference/