Eins og flestir vita þá hefur staðið yfir endurbótatímabil í Eyrardalnum undanfarið. Þegar við opnuðum í júní 2010 var loftið að mestu óklárað og veggir aðeins grunnaðir. Í nóvember var hafist handa við að klæða loftið með panel og ganga frá í kringum glugga. Nú er því lokið og er verið að mála húsnæðið bæði uppi og niðri (þ.e. loft, eldhús og kaffihús). Kofrastofan og sýningarsalurinn eru enn með sama sniði en þegar farið verður í þrif og frágang munum við setja inn nokkrar nýjungar á sýninguna. Tafir hafa orðið á verkinu en gert er ráð fyrir að við opnum um páskana með sérstakri dagskrá og glænýju gamaldags útliti á kaffihúsinu og á loftinu.

Við biðjumst afsökunar á því að hafa ekki getað tekið á móti gestum í vetur en hlökkum jafnframt til þess að sjá ykkur aftur.

Tveir mikilvægir bakhjarlar Melrakkaseturs féllu frá á seinnihluta síðasta árs, með aðeins mánaðar millibili, þau Páll Hersteinsson (f. 22.3. 1951, d. 13.10. 2011) og Kristjana Guðný Samúelsdóttir, hún Jana okkar Sam (f. 12.5. 1918, d. 13.11. 2011).

Eftir andlát Jönu Sam hefur Melrakkasetrinu borist fjárstuðningur, frá ættingjum og vinum - til minningar um þessa merku konu, inn á Jönusjóðinn. Við erum þakklát fyrir stuðninginn og viss um að Jana er ánægð með að aðrir skyldu halda áfram að styðja við það sem henni þótti mikilvægt.

Kollegar Páls og vinir í norður Noregi söfnuðu dágóðri upphæð til minningar um Pál og hafa ánafnað Melrakkasetrinu. Við erum stolt og þakklát fyrir framlagið, höfum stofnað sjóð í hans minningu og munum gera okkar besta til að halda uppi nafni og starfi Páls með rannsóknum á melrakkanum á Íslandi.

Þeim sem vilja leggja setrinu lið og heiðra í leiðinni minningu Páls eða Jönu, er bent á reikningsupplýsingar hér neðar á síðunni. Nánari upplýsingar um sjóðina er að finna á síðunni "styrktarsjóður".

...
Meira