Árið 2010 er ár líffræðilegrar fjölbreytni samkvæmt ákvörðun Sameinuðu Þjóðanna og ákvað Umhverfisráðuneytið að tileinka dag umhverfisins í ár þessum málaflokki.

Dagur umhverfisins er haldinn 25. apríl ár hvert en þann dag árið 1762 fæddist Sveinn Pálsson, fyrsti íslenski náttúrufræðingurinn.

Melrakkasetrið er því miður ekki með neina dagskrá í tilefni dagsins en bendir á eftirfarandi:
Náttúrustofa Vestfjarða býður öllum til fjöruferðar í Ósvör sunnudaginn 25. apríl.
Þar gefst tækifæri fyrir alla, unga sem aldna, til að finna sérfræðinga Náttúrustofunnar í fjöru og fræðast um margbreytileika fjörulífs og skoða fugla. Sjá vef Náttúrustofunnar: www.nave.is

Fjöruferðin hefst kl. 11:00 og stefnt er að því að ljúka henni kl. 12:00
Sjóminjasafnið í Ósvör verður opið eftir fjöruferðina og er aðgangur ókeypis.

Einnig bendum við á dagskrá í Öskju, Náttúrufræðahúsi Háskóla Íslands, laugardaginn 24. apríl kl. 10.30 til 15.00 og kallast:
Líf á eldfjallaeyju
- sjá nánar á vef HÍ: http://www.hi.is/vidburdir/lif_a_eldfjallaeyju_dagskra_fyrir_alla_fjolskylduna 

 

Þessa dagana sinnir Melrakkasetrið sínu nærsamfélagi og býður nemendum í Grunnskóla Súðavíkur upp á fræðslu um melrakka, mýs og fleiri spendýr í íslenskri náttúru. Grunnskóladeildin er einsetinn skóli fyrir 0. - 10. bekk. Nemendum er kennt í þremur námshópum: unglingastigi, miðstigi og yngsta stigi. Fimm ára nemendum er kennt með yngsta stigi í allt að 13 stundir á viku.
Forstöðumaður Melrakkasetursins kemur tvisvar í hvern námshóp í eina til tvær kennslustundir í senn, styst hjá yngsta hópnum og lengst hjá þeim elstu. Börnin læra um spendýr á Íslandi með sérstakri áherslu á hagamýs og melrakka.
Má segja að börnin séu mjög áhugasöm og mörg hver ansi vel að sér um spendýrin okkar. Þau stóðu sig afar vel í fyrstu lotunni og má búast við að þau munu verða orðin ansi fær þegar kemur að þeirri seinni í vikulokin. Melrakkasetrið er nokkuð ánægt og býst við að fá ansi margar tillögur frá þessum flinku krökkum við framsetninu efnis á sýninguna sem verður opnuð í Eyrardal í júní.